Chaschperli-Gschichte

für Ching ab 4-jährig

U gäng mit derby: dr Chlämmerlibänz

Dr Chlämmerlibänz isch z Steffisburg deheim. Är isch gärn mit em Chaschper u dr Iris Kocher unterwägs für d’Chlämmerlibühni irgendwo ufz’stelle. Deheim ar Stockhornstrasse 15 het’s im Chaschperlichäller aber o Platz für ne ganzi Chindergarteklass. Dr Chlämmerlibänz fröit sech über jede Bsuech.

D Stück vor Chlämmerlibühni

I de letschte Jahr sy e Zylete eigeti Stück entstande, wo ds Repertoire vo dr Chlämmerlibühni bilde. Dir erfahret wyter unger öppis wenigs über die Stück.


We dr meh wettet wüsse, de mäudet nech doch.

Er Prinzässin ihre Troum (2003)

Am Abe vor ihrem Geburtstag erfüllt sech für d Prinzässin Rea e grosse Wunsch. Si darf säge, was si im Traum möcht erläbe. D Rea muss nid lang überlege. Si wott zum Ma im Mond flüge. Aber das geit nid ohni Umwäge. (nachere Gschicht vor Ruth Güdel)

Mutzli u Bäri (2004)

Ds Anneli verliert bym Beerisueche im Waud ihre Bäri. Zum Glück begägnet ere da dr Chaschper. Mit dr Hiuf vo de Ching u vom Hugo Dachs, wo würklech aues kennt im Waud, geits jetz uf d Suechi vom Bäri. Öb si ne äch wider fingt?

Dr musikalisch Bär (2005)

Dr Chaschper möcht syni neui Fischrute usprobiere, aber er mues uf sys Schwöschterli ufpasse. Da chunnt dr Fritzli u zeigt ihm stouz sys Musigdöseli. U wüll dr Chaschper das o gärn hät, wott er mitem Fritzli tusche. Dä hingäge wott die Fischrute zersch gseh. U wo di zrugg chöme, isch Chaschpers Schwöschterli furt. (nach Therese Keller)

Am Fröscheteich (2006)

D Frösche möchte es Früehligsfescht fyre. Aber da wird dr chly Quapi entführt. Cha ne äch dr Chaschper no rächtzytig rette?

D Buchwehprinzässin (2007)

D Prinzässin Söpfeli isch bim Chasper i de Ferie. Dert söu si lehre, nid eso ybildet u stolz z sy. Aber das isch nid so eifach. Bim Kommissiönle stibitzt d Söphi Täfeli. Aber sy äch das würklech Täfeli? D Prinzässin Söpheli mues e strubi Erfahrig mache.

Müggeli u Wäspi (2008)

E gheimnissvolli Geschicht mit em ne kurlige Name. Zwärg Müggeli het nid nume öppis verlore, er het grad zwöi Mau öppis verlore. U dr Chaschper hiuft ihm bim Sueche.

Em Fritzli sy Winterschlaf (2009)

Chöi eigentlech ou mir Mönsche e Winterschlaf mache? Dr Fritzli möchts probiere. Zäme mit Igu-Bethli

Ds Guggu-Vreneli (2010)

Ds Vreneli cha ohni Guetnacht-Gschicht nid yschlafe. Aber d Märli kennt si alli scho. Drum verzeut ere dr Chaschper e wunderbari, nigunaguneui Gschicht.

Dr Chirschiboum (2012)

D Grossmueter verzeut em Chaschper vo ihrne Erläbnis, wo si no es chlyses Meitschi isch gsy, Mitel Chirschiboum erläbe d Ching dr Wächsu vo de Jahreszyte.

D Elfina erläbt es Abetüür (2013)

D Wunderblume vo dr Elfefee isch gstole worde. Di chlyni Elfe Elfina macht sech uf d Suechi. Dasch nid einfach. Dr Chasper begleitet se u versteit o di kurlegi Sprach vom «Zapfi». U zum Glück gits o no dr Trilliwip.

Em Chaschper si Reis (2015)

Dr Chaschper möcht einisch e grossi Reis mache. Ganz wyt wäg. Zum Byspiel uf Afrika. Chan er äch da mitem Velo ga?

Es Märli für ds Änneli (2017)

Ds Änneli het Schuelufgabe. Es sött sälber es Märli erfinde. Das isch schwierig. Cha öppe dr Chaschper hälfe? Zum Glück git’s no d’Eulalia, die alti u gschidi Eule im Wald.

Ds Rägineli (2018)

Ds Rägetröpfli Rägineli wohnt im Wulcheschloss bir Wulchefee. Es wett scho lang mal uf e ne Reis gah. Hüt isch es sowit. D’Wulchefee schickt ds Rägineli abe uf d’Wält uf e ne längi Reis bis i ds grosse Meer. Findet ds Rägineli ächt dr Wäg bis i ds Meer? Zum Glück begägnet äs immer wieder Fründe, wo ihm witer hälfe.

D’Prinzässin Gugeligunde (2019)

D’Prinzässin Gugeligunde lachet u gugelet dr ganz Tag. Aber plötzlech isch si nume no truurig. Was isch ächt passiert? Zäme mit em luschtige Vogel Pickwick hilft dr Chaschper, dass d’Prinzässin Gugeligunde wieder fröhlech wird.

Uf dr Murmelialp (2020)

Dr Chaschper tuet gärn wandere. Hüt wott är uf d’Murmelialp. Was erläbt är ächt alles uf dere Wanderig? Begägnet är öppe sogar em e Murmeli? Wo dr Chaschper wieder hei zum Grossmueti chunnt u si Rucksack uspackt, da macht är grossi Ouge!

Wär derhinger steit

Mi Name isch Iris Kocher u i spiele sider 20 Jahr lydeschaftlech Chasperlitheater für Ching. Dernäbe gseht me mi öppe o uf Bühnine vo Amateurtheatergruppe i dr Region Thun oder bi bsundrige Stadtfüehrige z Thun. I chume gärn mit eire vo myne Gschichte o zu euch.

Zäme cho

We dir e Frag heit oder mi gärn wettet engagiere, de schrybet oder telefonieret oder mailet


Es freut mi aues zäme


Adrässe 

Stockhornstrasse 15

3612 Steffisburg


Telefon

079 199 57 22

© chlämmerlibühni


Website: z-grafix.ch

Biuder vom Chlämmerlibänz: z-arts.ch